东华嘉年华试玩报告！4大机动游戏有几抵玩？

今个冬天真係嘉年华嘅季节，除咗中环嘅AIA欧陆嘉年华之外，启德邮轮码头亦有九龙区代表，传说中好刺激嘅东华慈善嘉年华亦都喺今日（23/12）正式开幕喇！话就话正式开幕，但係原来仲有部分场地未set up好，连机动游戏都未到齐香港，不过好在「陀飞轮」、80米高跳楼机都已经有得玩。今次记者Mandy就继续玩命，率先试玩4大刺激机动游戏，话畀大家知到底係抵玩之选，抑或伏味甚浓。

1. 全球首次登场！360度陀飞轮（$120）

陀飞轮係2015年瑞士最新研製嘅机动游戏，由3个四方框组成，向不同方向环迴立体式转动，睇见到晕晕哋。

 

刺激度：★★★★☆

离心力十足，锺意玩机动游戏嘅朋友相信会满意，而且有几秒慢动作倒吊于半空，都几刺激！

抵玩度：★★☆☆☆

玩嘅时间都几短，只係两分钟左右，但係就索价$120，虽然係全球首部，但係都略嫌有d贵。

评语：比想象中轻鬆，因为唔会撞嚟撞去，所以享受离心力嘅同时又唔会撞到好辛苦，抵讚！不过3个四方框睇嚟只係外型上嘅噱头，因为实际上外面两个四方框对刺激度并无影响，极其量都只係会令玩家眼花花晕陀陀。

2. 全球最高！27层楼跳楼机（$100）

相信锺意玩机动游戏嘅大家都一定玩过跳楼机，今次呢部係全球最高，有成80米，一定要试！连畏高嘅记者都胆粗粗玩咗次，你唔係唔挑战呀？

刺激度：★★★★★

话晒全球最高跳楼机，当然有返咁上下离心力，想唔刺激都难！

抵玩度：★★★★☆

同主题公园嘅跳楼机唔同，呢个只会向下冲一次，唔会反覆上落，所以记住要好好珍惜嗰几秒。不过$100玩一次世界级嘅跳楼机，都唔算太贵。

评语：由于有成80米，所以升上最高处都花咗一段时间，如果够胆嘅，都可以趁机欣赏吓维港风光。另外，跳楼机嘅安全带将玩家固定得好实，感觉好安全，抵讚。不过同时亦因为太实，所以即使向下冲嘅时候都唔会成个飞起，好似硬係争咁d，冇咁刺激咁。

3.旋转版海盗船！超级摇滚（$50）

呢部超级摇滚最高处有成30米咁高，而且一路摇仲会一路转，每次望到嘅角度都唔同，有时可以望住对面车卡嘅玩家，有时又可以望住附近嘅景色，都几过瘾。

刺激度：★★★★☆

摇到最高嘅时间仲高过水平线，如果转到啱角度嘅话，仲会好似成个人向下冲咁！而且最重要嘅係，虽然转嚟转去，但係由于座位唔会高速自转，所以绝对唔辛苦唔晕。

抵玩度：★★★★★★

$50呢个价钱本身已经好吸引，玩完仲要发现咁好玩，大家都话玩两次都抵呀！

评语：一睇呢部机动游戏嘅外型，以为佢又係好似「洗衣机」咁转到头都晕埋，玩完实想呕，点先玩落先发现唔晕不特止，仲好刺激，就好似一部识转嘅海盗船咁，个个都话仲好玩过陀飞轮！

4. 6层高波浪滑梯！滑唔滑到㗎？（$40）

呢条旧年美国超级碗期间热爆嘅波浪滑梯，玩家可以坐喺特製毛毡上面滑落嚟。滑梯人人都玩过，但係6层高嘅你又玩过未？

刺激度：★☆☆☆☆

记者试玩嘅时候，咁啱落咗几分钟毛毛雨，令滑梯表面有水点，所以毛毡完全唔滑，几乎零刺激。

抵玩度：★★☆☆☆

本来$40喺嘉年华已经算係比较平价嘅选择，不过太受天气影响，万一畀咗钱又滑得唔顺利，就真係几唔抵。

评语：虽然记者玩得不太顺利，但係较早前稍为好天嘅时候，目测玩家们普遍顺利滑落，睇落都几好玩几刺激，所以大家记住睇清楚天气先决定玩唔玩。

Mandy短评

目前已经开放嘅机动游戏唔算多，一入场嘅时候其实都有少少失望，不过好彩玩落都算刺激，总算满足到我热爱机动游戏嘅心。建议大家都係等多一排先嚟会比较稳阵，因为除咗机动游戏之外，摊位、食物等等都未预备好晒，有唔少今日入场嘅市民都表示失望，所以都係等多一段时间，run顺咗再嚟玩啦！

提提你：今次嘉年华对机动游戏嘅安全要求颇高，长头髮记得要扎起，而拍摄器材亦都要固定喺双手，唔可以就咁拎住。

东华慈善嘉年华2015

地址：前启德机场跑道

日期：23/12/2015 – 28/3/2016

门票：$180 (包机动游戏面值 $120 及 摊位游戏面值$40 )

开放时间：23/12/2015 – 3/1/2016: 11am – 11pm ;

4/1/2016开始: 3pm – 11pm(星期一至四)、11am – 11pm (星期五六日及公众假期)